၆ အောက်တိုဘာ ၂၀၂၁
ကုလသမဂ္ဂ အတွင်းရေးမှူးချုပ်ရဲ့ မြန်မာအထူးကိုယ်စားလှယ် Christine Schraner Burgener ဟာ အောက်တိုဘာ ၄ ရက်နေ့က ဂျာမန်နိုင်ငံခြားရေးအတွင်းဝန် Miguel Berger နဲ့ ဘာလင်မြို့မှာ တွေ့ဆုံခဲ့ပြီး မြန်မာနိုင်အရေး ဆွေးနွေးကြောင်း သိရပါတယ်။
ဆွေးနွေးပွဲ အသေးစိတ်ကို သတင်းထုတ်ပြန်တာ မတွေ့ရပေမယ့် မြန်မာနိုင်ငံမှာ ဒီမိုကရေစီ ပြန်လည်တည်ဆောက်နိုင်ရေး၊ အမှန်တကယ် လိုအပ်နေသူတွေအတွက် လူသားချင်းစာနာတဲ့ အကူအညီတွေ ပေးရေးနဲ့ ရိုဟင်ဂျာအရေးတွေကို ဆွေးနွေးကြတယ်လို့ ဂျာမန်အတွင်းဝန်က သူ့ရဲ့ တွစ်တာမှာရေးသားထားပါတယ်။
အထူးကိုယ်စားလှယ် Christine Schraner Burgener ဟာ မြန်မာနိုင်ငံက လက်ရှိ ဖြစ်ပျက်သမျှ အားလုံးဟာ အာဏာသိမ်း မြန်မာစစ်ခေါင်းဆောင်တွေမှာပဲ တာဝန်ရှိတယ်လို့ တောက်လျှောက် ပြောခဲ့သူဖြစ်ပါတယ်။
မြန်မာပြည်သူတွေ အကျိုးအတွက် ငြိမ်းချမ်းစွာ တွေ့ဆုံဆွေးနွေးဖို့ အကြံပေးချက်တွေကို အာဏာသိမ်း စစ်ခေါင်းဆောင်တွေဘက်က လက်မခံခဲ့တဲ့အတွက် NUG နဲ့ PDF လူငယ်တွေဟာ ရွေးချယ်စရာ မရှိတော့ဘဲ လက်နက်ကိုင် ပြည်သူ့ခုခံတော်လှန်ရေး လမ်းကြောင်းကို ရွေးချယ်လိုက်ကြရတာလို့ အထူးကိုယ်စားလှယ် Christine Schraner Burgener က နိုင်ငံတကာကို ရှင်းလင်းတင်ပြပြီးလည်းဖြစ်ပါတယ်။
