(တရုတ်နိုင်ငံခြားရေး၀န်ကြီးဌာန မူဝါဒလေ့လာရေး ဒုတိယခေါင်းဆောင်ရဲ့ ရုရှားယူကရိန်းအစီရင်ခံစာမှ ကောက်နုတ်ချက်)
သမ္မတပူတင်အနေနဲ့ သူထင်ထားသလို သူရည်မှန်းထားသလို ဖြစ်လာဖို့ မလွယ်ကူပါဘူး။ မြို့တော်ကို သိမ်းပိုက်လို့ ရုပ်သေးအစိုးရတင်ထားနိုင်ရင်တောင် ယူကရိန်းခုခံစစ်ဟာ ရှိနေမှာဖြစ်ပြီး အိမ်နီးချင်းနိုင်ငံတွေပါ ပါလာမယ့်အနေအထားကို ရောက်လာပါမယ်။ တတိယကမ္ဘာစစ်နဲ့ နျူကလီးယားစစ်ပွဲကြီးအထိ ဖြစ်လာနိုင်ပါတယ်။ လက်ရှိယူကရိန်းစစ်မြေပြင်အခြေအနေတွေအရ ရုရှားဟာ အမေရိကန်နဲ့ အနောက်နိုင်ငံတွေကို စစ်ရေးအရ ဘယ်လိုမှမယှဥ်နိုင်ဘူးဆိုတာ သက်သေပြနေသလို အဲဒီအချက်ကို မှန်မှန်ကန်ကန်မြင်တတ်ဖို့ လိုပါတယ်။ စစ်ကြီးဖြစ်ခဲ့ရင် ရုရှားဟာ သေချာပေါက်အရှုံးနဲ့ရင်ဆိုင်ရမှာပါ။
ကမ္ဘာစစ်မဖြစ်အောင် ရှောင်ရှားနိုင်ခဲ့ရင်လည်း ယူကရိန်းခုခံစစ်နဲ့ နိုင်ငံတကာပိတ်ဆို့မှုတွေကြောင့် နှစ်အနည်းငယ်အတွင်းမှာ ရုရှား စီးပွါးရေးပြိုလဲပြီး တချိန်က အာဖဂန်နစ္စတန်ကနေ ဆိုဗီယက်တွေ ထွက်ခွါရသလို အရှုံးနဲ့ သေချာပေါက်ရင်ဆိုင်ရပါမယ်။
လက်ရှိမှာကို အမေရိကန်ဟာ သံတမန်နည်းကို ဦးစားပေးတယ်ဆိုတဲ့ ဗျူဟာနဲ့ Global United Democratic Force ပုံစံမျိုး တည်ဆောက်နေတာတွေ့ရမယ်။ ယူကရိန်းကို ၀င်တိုက်ချိန်မှာ အမေရိကန်ရဲ့ ဗျူဟာ မြန်မြန်ဆန်ဆန်အောင်မြင်သွားတာမြင်ရပါမယ်။ကမ္ဘာကြီးဟာ ၂ ခြမ်းကွဲသွားပြီး ရုရှားဘက်မှာ ဘယ်သူမှ မရှိသလောက်ဖြစ်သွားတာတွေ့ရမှာပါ။ အမေရိကန်မကြိုက်တဲ့နိုင်ငံတွေတောင် ယူကရိန်းပြဿနာမှာ အမေရိကန်ဘက်က ရပ်တည်သလိုဖြစ်သွားတာ အထင်အရှားပါ။
တရုတ်ကတော့ ကမ္ဘာ၂ခြမ်းရဲ့အလယ်မှာ ရှိနေဆဲလို့ ပြောနိုင်ပါတယ်။ အလယ်မှာ ကြာရှည်ရပ်နေလို့ မဖြစ်နိုင်ပါဘူး။ ရုရှားအပေါ် ပိတ်ဆို့မှုဟာ အဓိက အထိနာမှာက တရုတ်ဖြစ်ပါတယ်။ ဆေးလိပ်သောက်တဲ့ သူနားမှာ ရပ်မိလို့ ဆေးလိပ်ငွေ့ရှူရှိူက်မိသူလို ဖြစ်ပါလိမ့်မယ်။
ရုရှားပြီးတာနဲ့ အင်ဒိုပစိတ်ဖိတ်ဒေသက တရုတ်အလှည့်ဖြစ်မှာ သေချာပါတယ်။ အခုထက်ပိုပြီး အမေရိကန်နဲ့ အနောက်နိုင်ငံတွေက ပိုဖိအားပေးတာ အထီးကျန်အောင်လုပ်တာတွေ လုပ်လာမှာ မေးခွန်းထုတ်စရာမလိုပါ။ ယူကရိန်းပြဿနာဟာ ဒေသတွင်းက သြစတေးလျ ဂျပန် တောင်ကိုရီးယားတို့ကို အရင်ကထက် ပိုစည်းလုံးသွားစေတာလည်း မြင်ရမှာဖြစ်ပါတယ်။ အထီးကျန်လူတောမတိုးတဲ့ ဘ၀ကို ရောက်သွားနိုင်ပါတယ်။
ပူတင်အပေါ် စာနာထောက်ထားနေလို့ ပြန်ရမယ့်အကျိုးစီးပွါးနဲ့ ပူတင်နဲ့လမ်းခွဲပြီး နိုင်ငံတကာနဲ့ ပူးပေါင်းလို့ပြန်ရမယ့်အကျိုးစီးပွါးကို ချိန်ထိုးရပါမယ်။ ပူတင်အပေါ်စာနာရပ်တည်လို့ ပြန်ရမယ့်အကျိုးစီးပွါးဟာ မရှိသလောက်ပါပဲ။ ပူတင်နဲ့အဆက်ဖြတ်ပြီး လက်ရှိ နိုင်ငံတကာကတောင်းဆိုနေတဲ့ ရေစီးကြောင်းထဲကို တရုတ်က ၀င်လိုက်ပါတောင်းဆိုမယ်ဆိုရင် တရုတ်အပေါ် နိုင်ငံတကာအမြင်တွေပြောင်းသွားနိုင်သလို ၂ ခြမ်းကွဲကမ္ဘာကြီးကို ပြန်စုစည်းပေးနိုင်တဲ့ အင်အားကြီးနိုင်ငံတခုအဖြစ် အသိအမှတ်ပြုတာခံရပါမယ်။ ပူတင်ရဲ့ရန်လိုမှုတွေ ကျဆင်းသွားနိုင်သလို ကမ္ဘာကြီးကို ခြိမ်းခြောက်နေတဲ့နျူကလီးယားစစ်ပွဲကြီးကိုပါ ကာကွယ်ပေးနိုင်ခဲ့တဲ့ နိုင်ငံကြီးအဖြစ် သမိုင်းတွင်ကျန်ခဲ့ပါမယ်။ ဒီအခြေအနေဟာ တရုတ်အတွက် လက်တွေ့ကျကျချည်းကပ်သုံးသပ်ဆုံးဖြတ်ရမယ့် အချိန်ကောင်းဖြစ်ပါတယ်။
Hu Wei is the vice-chairman of the Public Policy Research Center of the Counselor’s Office of the State Council
(မတ်လ ၅ ရက်နေ့က တင်သွင်းတဲ့ တရုတ်နိုင်ငံခြားရေး၀န်ကြီးဌာန မူဝါဒလေ့လာရေး ဒုတိယခေါင်းဆောင်ရဲ့ ရုရှားယူကရိန်းအစီရင်ခံစာမှ ကောက်နုတ်ဖေါ်ပြခြင်းဖြစ်သည်။ တရုတ်လူမူကွန်ယက်မှာ နာရီပိုင်းအတွင်း ဖတ်ရူသူ သန်းချီရှိခဲ့ပြီး ပြန်လည်ဖြုတ်ချခံထားရပါသည်)
