၁၃/၃/၂၀၂၂
စက်ပိုင်းဆိုင်ရာချို့ယွင်းမှုကြောင့် ဒုံးကျည်မတော်တဆမှားပစ်မိခဲ့တယ်ဆိုတဲ့ အိန္ဒိယအစိုးရရဲ့ ရှင်းလင်းချက်ကို လက်မခံနိုင်သေးကြောင်းနဲ့ ဘာကြောင့် မှားပစ်တယ်ဆိုတာကို စုံစမ်းစစ်ဆေးခွင့်ပေးဖို့ ပါကစ္စတန်က တောင်းဆိုထားပါတယ်။
နျူကလီယားလက်နက်တွေ ပိုင်ဆိုင်ထားတဲ့ နိုင်ငံကြီးက စစ်တပ်က စက်ပိုင်းဆိုင်ရာချို့ယွင်းမှုကြောင့်မှားပစ်မိတယ်ဆိုတာဟာ ဒေသတွင်းအိမ်နီးချင်းနိုင်ငံတွေအတွက် လုံခြုံရေးအာမခံချက်မရှိတော့ဘူးဆိုတာပြသနေတာလို့လည်း ပါကစ္စတန်စစ်တပ်ပြောခွင့်ရပုဂ္ဂိုလ်က ပြောပါတယ်။
အခု မှားပစ်လိုက်တယ်ဆိုတဲ့ ဒုံးကျည်ဟာ နျူကလီယားထိပ်ဖူးသယ်ဆောင်နိုင်တဲ့ဒုံးကျည်ဖြစ်လို့ နျူကလီယားလက်နက်သာဆိုရင် ပါကစ္စတန်အနာဂါတ်မတွေးရဲစရာပဲလို့လည်း ပြောပါတယ်။ အိန္ဒိယစစ်တပ်က နျူကလီးယားလက်နက်တွေနဲ့ ဒုံးကျည်တွေကို ဘယ်လိုတာ၀န်ယူထိမ်းသိမ်းနေတယ်ဆိုတာ မေးခွန်းထုတ်စရာဖြစ်နေသလို နျူကလီးယားလက်နက်နဲ့ အိန္ဒိယ ထိုက်တန်မှုမရှိဘူးဆိုတာပြသနေတယ်လို့လည်း ပါကစ္စတန်သတင်းတွေက ဝေဖန်ပါတယ်။
နျူကလီးယားလက်နက်တွေ ပိုင်ဆိုင်ထားတဲ့ နိုင်ငံအချင်းချင်း မတော်တဆမှားပစ်မိတယ်ဆိုတဲ့ ကြေညာချက်နဲ့ ပြီးဆုံးသွားလို့မဖြစ်နိုင်ဘူးလို့လည်း ပါကစ္စတန်စစ်တပ်ပြောခွင့်ရပုဂ္ဂိုလ်ကပြောပါတယ်။။ ဘာကြောင့်ဖြစ်ရတယ်ဆိုတာကို အိန္ဒိယတနိုင်ငံထဲ စုံစမ်းစစ်ဆေးမှုလုပ်လို့ မရပဲ ပါကစ္စတန်ကိုပါ စုံစမ်းစစ်ဆေးခွင့်ပေးရမယ်လို့ ပါကစ္စတန်စစ်တပ်ပြောခွင့်ရပုဂ္ဂိုလ်က တောင်းဆိုထားပါတယ်။ အိန္ဒိယအစိုးရကတော့ မတော်တဆမှားပစ်မိတဲ့အပေါ် တောင်းပန်ကြောင်းနဲ့ စုံစမ်းစစ်ဆေးမှုတွေ လုပ်မယ်လို့ ပြောထားပေမယ့် ပါကစ္စတန်ကို စုံစမ်းစစ်ဆေးခွင့် ပေးမပေးကိုတော့ တုန့်ပြန် အကြောင်း ပြန်တာမရှိသေးပါဘူး။
BNN/International News
