၂၄/၅/၂၀၂၂
ယူကရိန်းပင်လယ်နက်ထွက်ပေါက်ကို ပိတ်ဆို့ဖို့ ကျိုးစားနေတဲ့ ရုရှားရေတပ်ကို ဖြိုခွဲနိုင်မဲ့ လက်နက်တွေပေးပို့ဖို့ အမေရိကန်ဦးဆောင်တဲ့ အနောက်နိုင်ငံတွေက ဆုံးဖြတ်လိုက်ပါတယ်။ မေလ ၂၃ ရက် မနေ့က အမေရိကန်က ဦးဆောင်ကျင်းပတဲ့ အနောက်နိုင်ငံ ၄၃ နိုင်ငံရဲ့ကာကွယ်ရေး၀န်ကြီးများအစည်းအဝေးမှာ ဆုံးဖြတ်လိုက်တာပါ။ ခရုစ်ဒုံးကျည်တွေနဲ့ပစ်ခတ်နေတဲ့ ရုရှားရေတပ်ကို နှစ်မြုပ်နိုင်စွမ်းရှိတဲ့ Harpoon သင်္ဘော ဖျက်ဒုံးကျည်တွေကို ဒိန်းမတ်နိုင်ငံက ကူညီမှာဖြစ်ပြီး ကမ်းရိုးတန်းတာဝေးပစ်ဒုံးကျည်တွေနဲ့ တိုက်ရဟတ်ယာဥ်တွေကို ချက်နိုင်ငံနဲ့ ပိုလန်နိုင်ငံတွေက ကူညီမယ်ဆိုပါတယ်။
အမေရိကန် ကနေဒါ ပြင်သစ်နဲ့ နယူးဇီလန်က တာ၀ေးပစ် ဟောင်ဝစ်ဇာတွေ ဆက်လက်ပေးပို့မှာဖြစ်ပြီး လေယာဥ်ပစ်တင့်ကားတွေကို ဂျာမဏီက ကူညီမယ်လို့ အမေရိကန်ကာကွယ်ရေး၀န်ကြီးဌာနက သတင်းထုတ်ပြန်ပါတယ်။ အက်စတိုးနီးယားနိုင်ငံကတော့ သူ့နိုင်ငံစစ်အသုံးစားရိတ်ရဲ့ သုံးပုံတပုံကို ယူကရိန်းကို ကူညီမယ်ဆိုပါတယ်။
ဗြိတိန်ရဲ့ လေကြောင်းရန်ကာကွယ်ရေးဒုံးကျည်တွေကြောင့် ရုရှားဟာ လေတပ်ကို အားမထားရဲတော့ပဲ ပင်လယ်နက်ရေတပ်အုပ်စုရဲ့ တာဝေးပစ်ဒုံးကျည်တွေကိုပဲ အားကိုးလာရတယ်လို့ အမေရိကန်နဲ့ ဗြိတိန်ထောက်လှမ်းရေးသတင်းတွေက ဖေါ်ပြပါတယ်။ အဲဒီအတွက် ပင်လယ်နက်ရေတပ်အုပ်စုရဲ့ ပစ်ခတ်မှုတွေကို ဟန့်တားနိုင်ဖို့နဲ့ ပင်လယ်နက်ထွက်ပေါက်ကို ပြန်ဖွင့်နိုင်ဖို့ ရုရှားရေတပ် အုပ်စုတွေကို ပစ်မှတ်ထား တော့မဲ့ အဆင့်ဖြစ်လာနေပြီလို့ သတင်းတွေက ဖေါ်ပြပါတယ်။
BNN သတင်းဌာနသည် ဒီမိုကရေစီ နှင့် လူ့အခွင့်အရေးကို အလေးထားပြီး မြန်မာပြည်သူတို့အတွက် သတင်းမှန် များကိုသာ တင်ဆက်ပေးသွား မည်ဖြစ်သည်။
Burma News Network
