ရန်ကုန်၊ နိုဝင်ဘာ ၁၀
ရန်ကုန်၊ လမ်းမတော်မြို့နယ် ၊ ဘုန်းကြီးလမ်းနှင့်ကမ်းနားလမ်းဘက် ၊ အထွေထွေအုပ်ချုပ်ရေးမှူးရုံးအနီး လမ်းမပေါ်တွင် ယနေ့ နံနက် ၇ နာရီ ၄၀ မိနစ်အချိန် ဗုံးပေါက်ကွဲမှု ၄ ကြိမ်ဖြစ်ပွားပြီး ကားတစ်စီးမီးလောင်နေကြောင်း ဒေသခံများက ရန်ကုန်ခေတ်သစ်သတင်းဌာနသို့ ပြောဆိုသည်။
ယနေ့ နံနက်ပိုင်း ၇ နာရီ ၄၀ မိနစ် အချိန် ခန့် တွင်လမ်းမတော်မြို့နယ်၊ဘုန်းကြီးလမ်း၊ကမ်းနာလမ်းဘက်၊ထွေအုပ်ရုံး အနီးကျောက်လမ်းမပေါ် တွင် ဗုံးပေါက်ကွဲမှု ၄ ကြိမ် ဖြစ်ပေါ် ခဲ့ပြီး ယာဥ်တစ်စီး မီးလောင်မှုဖြစ်ပွားနေကြောင်း၊ ရဲနှင့်စစ်သားများက ကမ်းနားလမ်းကို ပိတ်ဆို့ထားပြီး မဆိုင်သူများ အပြင်မထွက်ရန် ပြည်သူများကို ဆဲဆိုခြိမ်းခြောက်နေကြောင်း လမ်းမတော်ပြည်သူတစ်ဦးက ပြောဆိုသည်။
“ လမ်းထဲက စျေးသည်တွေလည်း ပြန်သိမ်းခိုင်းတယ်။ တိုက်ပေါ်က လူတွေလည်း မဆိုင်ရင် မဆင်းနဲ့ ခေါင်းပြူမကြည့်နဲ့ ပစ်ခံရမယ်ဆိုပြီး အော်ဟစ်ဆဲဆိုတယ်။ ကမ်းနားလမ်းကိုပိတ်ပြီး စစ်နေတယ် အခု” ဟု ဒေသခံတစ်ဦးက ဆိုသည်။
မျက်မြင်လမ်းတော်ဒေသခံတစ်ဦးကမူ လမ်းဘေးတွင် လာရောက် ရပ်နားထားသော ကားပေါ်မှ မိနစ်ပိုင်းအတွှု်း ဗုံးများ ပေါက်ကွဲခြင်းဖြစ်ကြောင်း၊ ကားဖြင့် ဗုံးခွဲခြင်းဟု ဆိုနိုင်ကြောင်း မှတ်ချက်ပြု ပြောဆိုသည်။
လက်ရှိတွင် လမ်းတော် ၁၃ လမ်းကို စစ်ကောင်စီတပ်များက ဝင်ရောက် စီးနင်း စစ်ဆေးလျက်ရှိပြီး ဗုံးပေါက်ကွဲမှု ကြောင့် စစ်သား ၁ ဦး လက်ပြတ်သွားကြောင်း ဒေသခံတစ်ဦးက ပြောသည်။ “ ဗုံးလာဖြုတ်တဲ့သူ စစ်သားတစ်ဦး လက်ပြတ်သွားတယ်။ အခုထိ စစ်ခွေးတွေရှိနေတုန်းပဲ။မီးသတ်တွေရော ရောက်နေတယ်၊ ဗုံးက စုစုပေါင်း ၆ ခါပေါက်တယ်။ ၁၃ လမ်းထဲမှာ အိမ်တွေပေါ်ကိုပါ တက်စစ်နေတာ” ဟု ဒေသခံတစ်ဦးက ဆက်လက်ပြောဆိုသည်။
Source : Khit Thit Media
