၂၁ နိုဝင်ဘာလ ၂၀၂၁
လက်ရှိအချိန်အထိ တရားမဝင်အာဏာသိမ်းစစ်ကောင်စီကို မည်သည့်နိုင်ငံကမျှ အသိအမှတ်ပြု လက်ခံခြင်းမရှိသေးဘဲ နိုင်ငံတကာမျက်နှာစာမှာ စစ်ကောင်စီရဲ့လုပ်ပိုင်ခွင့်တွေကိုများစွာ ကန့်သတ်ခံထားရတယ်လို့ ကုလသမဂ္ဂဆိုင်ရာမြန်မာသံအမတ်ကြီး ဦးကျော်မိုးထွန်းက ပြောပါတယ်။
ဒီမနက်ပိုင်းက ပြုလုပ်ခဲ့တဲ့ People’s Soldiers – ပြည်သူ့စစ်သားများရဲ့ ပြည်သူ့စစ်သားစကားဝိုင်းမှာ သံအမတ်ကြီးဦးကျော်မိုးထွန်းပါဝင်ဆွေးနွေးခဲ့ရာ အကြမ်းဖက်စစ်ကောင်စီရဲ့ နိုင်ငံတကာ မျက်နှာစာအခြေအနေကို အခုလိုထည့်သွင်းပြောကြားခဲ့တာပါ။
“ဒါကလည်း နိုင်ငံတကာအသိုင်းအဝိုင်းအနေနဲ့ ကျွန်တော်တို့ပြည်သူတွေက ဓမ္မဘက်မှာရပ်တည်ပြီးတော့ ဒီမိုကရေစီပြန်လည်ရရှိရေး၊ ပြည်သူ့အာဏာ ပြည်သူ့ထံပြန်လည်ရရှိရေးဆောင်ရွက် နေတဲ့ဥစ္စာမျိုးမှာ ဒီလိုပုံစံမျိုးနဲ့ အားပေးနေတယ်ဆိုတာ အရမ်းပေါ်လွင်ပါတယ်” လို့ ဦးကျော်မိုးထွန်းက ပြောပါတယ်။
ကုလသမဂ္ဂလုံခြုံရေးကောင်စီ(UNSC)က မြန်မာအခြေ အနေနဲ့ပတ်သက်လို့ ဆုံးဖြတ်ချက် (Resolution)ချမှတ်ခြင်းမရှိသေးပေမယ့် ဆုံးဖြတ်ချက်ထွက်ပေါ်စေရန် ဆက်လက်ကြိုးစားနေ ကြောင်းလည်း သံအမတ်ကြီးက ပြည်သူတွေကို အသိပေးပါတယ်။
ဒါပေမဲ့ လုံခြုံရေးကောင်စီရဲ့ မြန်မာ့အရေးထုတ်ပြန်ချက်တွေဟာ အဖွဲ့ဝင်နိုင်ငံတွေရဲ့ သဘောထားတွေပါဝင်နေတာကြောင့် လက်ရှိတော်လှန်ရေးအတွက်လည်း ကူညီပံ့ပိုးမှုဖြစ်စေတယ်လို့ သံအမတ်ကြီးက ရှင်းပြပါတယ်။
အကြမ်းဖက်စစ်ကောင်စီဟာ လက်ရှိအချိန်အထိ ကုလ သမဂ္ဂမှာ ကိုယ်စားပြုခွင့်မရရှိသေးဘဲ ပြည်သူလူထုနဲ့ တသားတည်းရပ်တည်ကာ ဥပဒေမဲ့အာဏာသိမ်းမှုကို ဆန့်ကျင်တဲ့ သံအမတ် ကြီးဦးကျော်မိုးထွန်းက ကိုယ်စားပြုခွင့်ရရှိထားဆဲဖြစ်ပါတယ်။
တချိန်တည်းမှာ အမျိုးသားညီညွတ်ရေးအစိုးရ NUG ကို နိုင်ငံတကာအသိုင်းအဝိုင်းက တရားဝင် အသိအမှတ်ပြုမှုမရှိသေးခြင်းဟာ နိုင်ငံများရဲ့ ပြည်တွင်းဥပဒေတွေကြောင့်ဖြစ်နိုင်ပြီး တရားဝင် အသိအမှတ်ပြုမှုမရှိသေးပေမယ့် NUGရဲ့ လုပ်ဆောင်ချက်တွေကို ထောက်ခံနေတဲ့ နိုင်ငံများစွာရှိတယ်လို့ သံအမတ်ကြီးက ရှင်းပြသွားခဲ့တာဖြစ်ပါတယ်။
Credit – People’s Soldiers , People’s Spring
