၂/၅/၂၀၂၂
အမျိုးသားညီညွတ်ရေးအစိုးရ (NUG) နဲ့ အလွတ်သဘောထိတွေ့ဆက်ဆံသွားဖို့ အာဆီယမ်ကို အဆိုပြုအကြံပေးသွားမယ်ဆိုတဲ့ မလေးရှားနိုင်ငံခြားရေး၀န်ကြီးရဲ့ပြောကြားချက်ကို စကစနိုင်ငံခြားရေး၀န်ကြီးဌာနက စိတ်ဆိုးကန့်ကွက်ကြောင်း သတင်းထုတ်ပြန်ထားပါတယ်။
စကစ အကြမ်းဖက်မှုတိုက်ဖျက်ရေးကော်မတီက NUG(CRPH)နဲ့ PDFတွေကို အကြမ်းဖက်အုပ်စုတွေအဖြစ် ကြေညာထားပြီးဖြစ်လို့ ထိတွေ့ဆက်ဆံအားပေးစရာမလိုကြောင်း ဝဏ္ဏမောင်လွင်ရုံးကြေညာချက်က ဆိုပါတယ်။ မလေးရှား၀န်ကြီးအပြောဟာ နိုင်ငံတကာအကြမ်းဖက်မှုတိုက်ဖျက်ရေး သဘောတူညီချက်တွေကို ချိုးဖောက်ရာရောက်နေတယ်လို့လည်း အဆိုပါကြေညာချက်က ဖေါ်ပြပါတယ်။
ဝဏ္ဏမောင်လွင်ရုံးကသာ ကြေညာချက်တွေထုတ်ပြန်ကန့်ကွက်နေပေမဲ့ မလေးရှားအစိုးရနဲ့ နိုင်ငံခြားရေး၀န်ကြီးကတော့ ကြေညာချက်အပေါ် စိတ်၀င်စားပုံမရှိပါဘူး။ စကစကို အစိုးရအဖြစ်အသိအမှတ်မပြုတဲ့အတွက် စကစက ထုတ်ပြန်တဲ့ အကြမ်းဖက်တိုက်ဖျက်ရေးဥပဒေကို သိပုံမရသလို စိတ်၀င်စားပုံလည်းမရှိပါဘူး။
မေလ ၅ ရက်မှာ ကျင်းပမဲ့ အာဆီယမ်နိုင်ငံခြားရေး၀န်ကြီးများအစည်းအဝေးမှာ NUG/CRPH/NUCC တို့နဲ့ ထိတွေ့ဆက်ဆံသွားဖို့ အဆိုပြုသွားမယ်လို့ မလေး၀န်ကြီးက ပြောဆိုထားတာဖြစ်ပါတယ်။
အာဆီယမ်အလှဲ့ကျဥက္ကဌ ကမ်ဘောဒီးယား၀န်ကြီးချုပ်ဟွန်ဆန်ကိုယ်တိုင်တောင် စကစနဲ့ဆက်ဆံစကားပြောနေပေမဲ့ မြန်မာနိုင်ငံကိုယ်စားပြုအစိုးရအဖြစ် နိုင်ငံတကာမှာ ပွဲမထုတ်ရဲတော့တာတွေ့ရပါတယ်။ စကစရဲ့လက်ရှိအခြေအနေက ရုရှားနိုင်ငံထဲက လူဦးရေ ၃ သန်းကျော်သာရှိတဲ့ တာတာစတန်ပြည်နယ်ဥက္ကဌကို နိုင်ငံတော်သမ္မတတစ်ဦးလို့ ခေါ်ဝေါ်သုံးစွဲဆက်ဆံနေရတဲ့အခြေအနေလို့ ပြောနိုင်ပါတယ်။
BNN
