၂၅/၃/၂၀၂၂
ရုရှားက ယူကရိန်းကို ၀င်တိုက်တာဟာ ကျုးကျော်တာမဟုတ်ပဲ ယူကရိန်းပြည်သူတွေကို ခေတ်သစ် နာဇီအစိုးရအောက်က လွတ်မြောက်ဖို့ ကူညီတဲ့စစ်ပွဲဆိုတာကို တရုတ်တက္ကသိုလ် ကောလိပ်နဲ့ အထက်တန်းကျောင်းတွေမှာ ဝါဒဖြန့်ဟောပြောပွဲတွေစတင်နေကြောင်း တရုတ်ပါမောက္ခတွေက ပြောပါတယ်။
တရုတ်ကွန်မြူနစ်ပါတီညွှန်ကြားချက်အရဆိုပြီး တရုတ်ကွန်မြူနစ်ပါတီရဲ့ နိုင်ငံရေးအကြံပေးတွေက တနိုင်ငံလုံးမှာရှိတဲ့ တက္ကသိုလ်၊ ကောလိပ်နဲ့ အထက်တန်းကျောင်းတွေကို “ အတွေးအမြင်မမှားမိစေနဲ့ ” ဆိုတဲ့ ခေါင်းစဥ်နဲ့ လိုက်လံဟောပြောနေတယ်ဆိုပါတယ်။ အဆိုပါ ဟောပြောပွဲတွေကို ဆရာဆရာမတွေ မတက်မနေရ တက်ရောက်နားထောင်ဖို့ သက်ဆိုင်ရာ ဒေသခံအာဏပိုင်တွေက အမိန့်ထုတ်ထားတယ်လို့လည်း ပြောပါတယ်။
ဟောပြောပွဲတွေကို အကြောင်းပြချက်ခိုင်လုံအောင်မပြနိုင်ပဲ မတက်ရောက်သူတွေကို အလုပ်ထုတ်တာအထိ အရေးယူနိုင်ကြောင်းလည်း အဆိုပါအမိန့်တွေမှာ ဖေါ်ပြထားတယ်ဆိုပါတယ်။
တချို့ဒေသတွေက ဟောပြောပွဲတွေကို တရုတ်လို ထုတ်လွှင့်တဲ့ သတင်းဌာနတွေမှာ တိုက်ရိုက်ထုတ်လွှင့်ပြသနေတယ်လို့လည်း နိုင်ငံတကာသတင်းထောက်တွေက ပြောပါတယ်။
အဓိက လိုက်လံပြောဆိုတဲ့အထဲမှာ ရုရှားအစိုးရကပြောနေသလိုပဲ အချက် ၄ချက် ပါ၀င်တယ်ပြောပါတယ်။
ပထမအချက်ကတော့ ယူကရိန်းအစိုးရဟာ အဂတိလိုက်စားတဲ့ အစိုးရဖြစ်သလို ရုရှားစကားပြော ယူကရိန်း ၁ သောင်းကျော်ကို သတ်ဖြတ်ခဲတဲ့ နာဇီအစိုးရဖြစ်လို့ ရုရှားက ၀င်တိုက်ကူညီပေးရတယ်ဆိုတဲ့အချက်ဖြစ်ပါတယ်။
ဒုတိယအချက်ကတော့ အမေရိကန်နဲ့ NATO က ရုရှားကို ဟန့်တားပိတ်ဆို့ဖို့ အဖွဲ့၀င်နိုင်ငံတွေ တိုးချဲ့ဖို့ လုပ်လာသလို ယူကရိန်းကို အဖွဲ့၀င်နိုင်ငံအဖြစ် လက်ခံဖို့ ပြင်လာတဲ့အတွက် ရုရှားဟာ သူ့ရပ်တည်ရှင်သန်ရေးအတွက် ဆင်နွဲရတဲ့ တိုက်ပွဲဆိုပါတယ်။
တတိယအချက်ကတော့ အမေရိကန်ဟာ ဥရောပကို နယ်ချဲ့ထိမ်းချုပ်လိုတဲ့အတွက် ယူကရိန်းကို ဒေါ်လာဘီလျံချီပေးပြီး ရုရှားကို ခုခံတိုက်ခိုက်ဖို့ မြှောက်ပင့်ပေးခဲ့သလို ကျန် ဥရောပနိုင်ငံတွေကိုပါ မကူမနေရဖြစ်အောင်တွန်းပို့နေခဲ့ပြီး တဖက်မှာ ရုရှားကိုလည်း ယူကရိန်းကို မတိုက်မနေရအခြေအနေရောက်အောင် ဖန်တီးခဲ့တယ်ဆိုပါတယ်။
နောက်ဆုံးအချက်ကတော့ ရုရှားဟာ အမေရိကန်ခြေလှမ်းတွေကို မြင်လို့ သံတမန်နည်းနဲ့ဖြေရှင်းဖို့ အကြိမ်ကြိမ်ကျိုးစားခဲ့ပေမယ့် အမေရိကန်က လက်မခံပဲ တင်းခံခဲ့လို့ ရုရှားနိုင်ငံလုံခြုံရေးအရ ယူကရိန်းကို၀င်တိုက်ခဲ့ရတာလို့ ပါရှိပါတယ်။
နိဂုံးချုပ်မှာ ရုရှားက ယူကရိန်းကို၀င်တိုက်တာဟာ ကျုးကျော်စစ်မဟုတ်ပဲ တရားမျှတတဲ့စစ်ပွဲဖြစ်လို့ ကျောင်းသူကျောင်းသားတွေကို အတွေးမှားတွေ မ၀င်မိဖို့ ဆရာဆရာမတွေက သင်ကြားပို့ချရမယ်ဆိုတဲ့ အချက်ဖြစ်ပါတယ်။
တရုတ်နိုင်ငံမှာ နိုင်ငံတကာနဲ့ထိတွေ့ဆက်ဆံမှုမရှိတဲ့ တရုတ်နိုင်ငံသားတွေက တရုတ်အစိုးရပြောသလို အစိုးရပိုင်သတင်းဌာနတွေက ထုတ်လွှင့်နေတာကိုပဲ ယုံကြည်ကြပေမယ့် နိုင်ငံတကာနဲ့ ထိစပ်နေသူတွေ၊ နိုင်ငံတကာသတင်းတွေကို စောင့်ကြည့်သူလူငယ်တွေက ရုရှားဟာ ယူကရိန်းကို မတရားကျုးကျော်တိုက်ခိုက်နေတယ်ဆိုတဲ့အမြင်ရှိနေတယ်ဆိုပါတယ်။ တရုတ်အစိုးရအနေနဲ့ ရုရှားကို တိုက်ရိုက်ဖြစ်စေ သွယ်ဝိုက်ပြီးဖြစ်စေ စစ်ရေးစီးပွါးရေးကူညီပေးမယ်ဆိုရင် ပြည်တွင်းမှာ တရုတ်ပြည်သူတွေရဲ့ ကန့်ကွက်မှုတွေနဲ့ရင်ဆိုင်ရမှာကို စိုးရိမ်နေတဲ့အတွက် ပထမအဆင့်အနေနဲ့ ကျူးကျော်စစ်မဟုတ်ဘူးဆိုတာကို တရုတ်ပြည်သူတွေကြားမှာ ကျိုးစားဝါဒဖြန့်နေတာလို့ ဘီဂျင်းအခြေစိုက်သံတမန်တချို့က ပြောပါတယ်။ တရုတ်အစိုးရရဲ့ အခုလို လုပ်ရပ်တွေကို အမေရိကန် အနောက်နိုင်ငံတွေနဲ့ ယူကရိန်းကလည်း သိထားပြီး စောင့်ကြည့်နေတယ်ဆိုပါတယ်။
တရုတ်တက္ကသိုလ်နဲ့ အထက်တန်းကျောင်းတချို့က ဆရာဆရာမတွေကတော့ အလုပ်တွေက နုတ်ထွက်သွားကြသလို တချို့က နုတ်ထွက်လွှာတွေတင်ထားတယ်လို့လည်း တရုတ်လူမှုကွန်ယက်တွေမှာ ဖေါ်ပြနေပါတယ်။
