တရုတ်နဲ့ချုပ်ဆိုမယ့်စာချုပ်တွေကို လက်မှတ်မထိုးခင် အသေးစိတ်လေ့လာကြဖို့ ဗြိတိန်ထောက်လှမ်းရေးက သတိပေး

၁ ဒီဇင်ဘာ ၂၀၂၁

အခြေခံအဆောက်အအုံတွေ ပြင်ဆင်တည်ဆောက်ဖို့နဲ့ ပြည်တွင်းစီးပွါးရေးလုပ်ငန်းရင်းနှီးမြုပ်နှံမှုတွေမှာပဲဖြစ်ဖြစ် တရုတ်နိုင်ငံ တရုတ်အစိုးရကုမ္ပဏီတွေနဲ့လုပ်မယ်ဆိုရင် လက်မှတ်မထိုးခင် သေချာလေ့လာစစ်ဆေးကြဖို့ ဗြိတိန်ထောက်လှမ်းရေးအကြီးအကဲ Richard Moore က နိုင်ငံတကာကို သတိပေးလိုက်ပါတယ်။

ယူဂမ်နာနိုင်ငံမြို့တော်က အင်တက်ဘီအပြည်ပြည်ဆိုင်ရာလေဆိပ်ကို ချေးငွေပြန်လည်ပေးဆပ်ဖို့ပျက်ကွက်မှုနဲ့ တရုတ်ကုမ္ပဏီက သိမ်းပိုက်လိုက်ပြီဆိုတဲ့သတင်းတွေထွက်ပေါ်နေချိန်မှာ ဗြိတိန်ထောက်လှမ်းရေးအကြီးအကဲက သတိပေး ပြောဆိုလိုက်တာဖြစ်ပါတယ်။

ဗြိတိန်ထောက်လှမ်းရေးအနေနဲ့ နိုင်ငံတကာအကြမ်းဖက်အဖွဲ့တွေထက် တရုတ်ရဲ့ခြေလှမ်းကို ပိုပြီး အင်အားသုံး ထောက်လှမ်းခဲ့တယ်ဆိုပါတယ်။ တရုတ်ရဲ့ ခြေလှမ်းတွေကို ဖွင့်ပြောဖို့အချိန်ကျပြီဖြစ်တဲ့အတွက် အခုလိုဖွင့်ပြောရတာလို့လည်း Richard Moore က ပြောပါတယ်။

တရုတ်ဟာ ငွေအားလူအားသုံးပြီး ဗြိတိန်အပါအဝင် အနောက်နိုင်ငံတွေကို စုံစမ်းထောက်လှမ်းနေခဲ့တာကြာပြီလို့လည်း ဗြိတိန်ထောက်လှမ်းရေးအကြီးအကဲက ဆိုပါတယ်။ တရုတ်ထောက်လှမ်းရေးတွေရသွားတဲ့သတင်းအမှားတွေနဲ့ တရုတ်အစိုးရဟာ သွေးနထင်ရောက်အထင်ကြီး စိတ်ကြီးဝင်နေပုံရတယ်လို့လည်း ဗြိတိန်ထောက်လှမ်းရေးအကြီးအကဲက ပြောပါတယ်။ တရုတ်ထောက်လှမ်းရေးသတင်းမှားတွေနဲ့ အမေရိကန်နဲဲ့ဗြိတိန်ကို လျော့တွက်နေပုံရတယ်လို့လည်း သူက သတိပေးပါတယ်။

ဆင်းရဲတဲ့နိုင်ငံတွကို လမ်း တံတား ဆောက်လုပ်ရေးစီမန်ကိန်းတွေအတွက်ငွေထုတ်ချေးပေးပြီး အကြွေးပြန်မဆပ်နိုင်တဲ့လမ်းကြောင်းကို တရုတ်အစိုးရက ချမှတ်ကျင့်သုံးနေခဲ့တယ်လို့လည်း ဗြိတိန်ထောက်လှမ်းရေးအကြီးအကဲကပြောပါတယ်။ တရုတ်က ရောင်းချပေးနေတဲ့ ဆက်သွယ်ရေးပစ္စည်းနည်းပညာတွေကတဆင့် ဝယ်ယူသုံးစွဲနေတဲ့နိုင်ငံတွေရဲ့ အချက်အလက်တွေကို စုဆောင်းနေခဲ့တယ်ဆိုပါတယ်။

ထောက်လှမ်းရေးသတင်းအမှားတွေနဲ့ တိုင်ဝမ်ကို လျှော့တွက်ပြီး အင်အားသုံးသိမ်းပိုက်ဖို့ တရုတ်က ပြင်ဆင်နေတယ်လို့လည်း ဗြိိတိန်ထောက်လှမ်းရေးအကြီးအကဲက မနေ့က လန်ဒန်မှာကျင်းပခဲ့တဲ့ နိုင်ငံတကာမဟာဗျူဟာလေ့လာရေးဆွေးနွေးပွဲမှာ ပြောသွားပါတယ်။ ဗြိတိန်ထောက်လှမ်းရေးအကြီးအကဲ Richard Moore ဟာ ၁၉၈၀ ကတည်းက MI6 မှာ စတင်တာဝန်ယူခဲ့ပြီး ဗီယက်နမ် ပါကစ္စတန် တူရကီနဲ့ အီရန် မှာ ထောက်လှမ်းရေးတာဝန်တွေထမ်းဆောင်ခဲ့သူဖြစ်ပါတယ်။

BNN