၁၀/၀၃/၂၀၂၂
လတ်တလော ပူတင်ရဲ့ ကျူးကျော်စစ်ပွဲမှာ ရုရှားစစ်တပ်အခြေမလှဖြစ်နေတဲ့အကြောင်းရင်းထဲမှာ ယူကရိန်းရဲ့ ညီညွတ်မှုနဲ့ စိတ်ဓါတ်ပိုင်းသာလွန်မှုကြောင့်သာမက ရုရှားရဲ့တပ်တွင်းအကျင့်ပျက်ချစားမှုနဲ့ ဗိုလ်ကျအနိုင်ကျင့်မှုတွေကြောင့်ဖြစ်တယ်လို့ ရုရှား နိုင်ငံခြားရေးဝန်ကြီးဟောင်း Andrey Kozyrev ကပြောပါတယ်။
ရုရှားစစ်တပ်က ဗိုလ်ချုပ်တွေဟာ စစ်လက်နက်ပစ္စည်းထုတ်လုပ်ရောင်းဝယ်တာတွေ တပ်အသုံးစရိတ်တွေကို အကျင့်ပျက်အလွှဲသုံးစားလုပ်ပြီး ကိုယ်ကျိုးစီးပွါးအတွက်အသုံးချနေကြတာကြာပြီဆိုပါတယ်။
ခိုးယူထားတဲ့ငွေတွေကို ဆိုက်ပရပ်စ်မှာရင်းနှီးမြှုပ်နှံမှုတွေလုပ်ထားကြပြီး စစ်ဗိုလ်ချုပ်တွေနဲ့မိသားစုတွေဟာ ခေတ်ပျက်သူဌေးတွေလိုပဲ အခွင့်ထူးခံနေကြတာ အနှစ် ၂၀ ရှိပြီလို့ ပြောပါတယ်။
အဲဒီလို ဆိုက်ပရပ်စ်မှာ ရင်းနှီးမြှုပ်နှံမှုတွေကြောင့် ယူရိုပီယံ Golden Passport တွေရထားပြီး ဥရောပတခွင်မှာ ဇိမ်ခံရွက်လှေတွေ၊ အပမ်းဖြေအိမ်တွေနဲ့ သာယာနေတာ ကြာပြီလို့လည်း သူကပြောပါတယ်။
ပူတင်အာဏာရခဲ့တဲ့ကာလတလျှောက်လုံး ရုရှားစစ်တပ်အတွက် ဒေါ်လာဘီလျံပေါင်းများစွာသုံးစွဲခဲ့ပေမဲ့ တပ်တွင်း အဆင့်ဆင့်အကျင့်ပျက်ချစားမှုတွေကြောင့် အမှန်တကယ် အင်အားတောင့်တင်းခိုင်မာတဲ့ စစ်တပ်ဖြစ်မနေခဲ့တာလို့ ဆိုပါတယ်။ စစ်လက်နက်ထုတ်တဲ့ အမည်ခံကုမ္ပဏီတွေနဲ့ စစ်ဗိုလ်ချုပ်တွေပေါင်းပြီး အစီရင်ခံစာတွေ လိမ်ညာထုတ်ပြန်ခဲ့ကြတာပဲများခဲ့တာလို့ နိုင်ငံခြားရေးဝန်ကြီးဟောင်းကပြောပါတယ်။
စစ်လက်နက်ထုတ်လုပ်ရောင်းဝယ်ရေးပိုင်းမှာ တာဝန်မယူရတဲ့ ဗိုလ်ချုပ်တွေကလည်း တပ်တွင်းရိက္ခာတွေကို အနိုင်ကျင့်ဖြတ်တောက်တာတွေ သေဆုံးစစ်သားတွေအတွက် ရတဲ့လျော်ကြေးငွေ တွေဖြတ်ယူတာတွေ လုပ်ပြီး ချမ်းသာနေတယ်ဆိုပါတယ်။ ဖြတ်ယူတာတွေများတဲ့အတွက် အခု ယူကရိန်းကို ဝင်တိုက်တာတောင် အောက်ခြေစစ်သားတွေကို လုံလောက်တဲ့ ရိက္ခာမပေးနိုင်ဘူးလို့ ရုရှားနိုင်ငံခြားရေးဝန်ကြီးဟောင်း Andrey က နိုင်ငံတကာသတင်းမီဒီယာတွေမှာ ထုတ်ဖေါ်ပြောဆိုထားပါတယ်။ ရုရှားနိုင်ငံခြားရေးဝန်ကြီးဟောင်းဟာ နိုင်ငံတကာလှည့်ပြီး စစ်အေးကာလ နိုင်ငံရေးအကြောင်းတွေနဲ့ ရုရှားအသွင်ကူးပြောင်းရေးအကြောင်းတွေကို ဧည့်ပါမောက္ခအနေနဲ့ဟောပြောပို့ချနေသူဖြစ်ပါတယ်။
လက်တွေ့မှာလည်း သူပြောသလိုပဲ ရုရှားစစ်သားတွေဟာ ယူကရိန်းကိုဝင်ရောက်ကျူးကျော်တိုက်ခိုက်ရင်းနဲ့ စတိုးဆိုင်တွေ ကုန်တိုက်တွေက ပစ္စည်းတွေကိုခိုးယူ၊ ကြက်ခြံတွေထဲက ကြက်တွေကိုခိုးယူ စားသောက်နေရတဲ့အခြေအနေ ဖြစ်နေတာကိုတွေ့ရပါတယ်။
BNN
