ရုရှားနိုင်ငံ ကာ့စ်ပြည်နယ်မြို့တော်က လေယာဥ်ကွင်းကို ယူကရိန်းက ဒရုန်းနဲ့တိုက်ခိုက်ခဲ့ကြောင်း ပြည်နယ်အုပ်ချုပ်ရေးမှူးရုံးက သတင်းထုတ်ပြန်ပါတယ်။ တိုက်ခိုက်မှုကြောင့် လေယာဥ်ကွင်းအနီးက ရေနံသိုလှောင်ကန် ထိမှန်ပေါက်ကွဲမီးလောင်ခဲ့ကြောင်းလည်း သတင်းထုတ်ပြန်ချက်မှာ ဖေါ်ပြပါတယ်။ သေဆုံးဒဏ်ရာရသူမရှိပေမဲ့ လေယာဥ်ကွင်းကို ရက်အကန့်အသတ်မရှိပိတ်ပင်ထားကြောင်းလည်း ပြည်နယ်တာဝန်ရှိသူတွေက ပြောပါတယ်။
ကာ့စ်လေယာဥ်ကွင်းဟာ ယူကရိန်းနယ်စပ်နဲ့ မိုင် ၆၀ နီးပါးအကွာမှာရှိပြီး တစ်ရက်အတွင်းမှာ ရုရှားလေဆိပ်တွေတိုက်ခိုက်ခံရတာ ဒါဟာ ၃ ကြိမ်မြောက်ဖြစ်တယ်လို့လည်း ရုရှားအစိုးရသတင်းတွေက ဖေါ်ပြပါတယ်။ ဒီဇင်ဘာ ၅ ရက်နေ့တရက်ထဲမှာတင် ရုရှားရဲ့မဟာဗျူဟာဗုံးကြဲ လေယာဥ် တွေထားရှိတဲ့ ရီဇန်ဒေသက ဒီဂီလီဗိုစစ်တပ်လေယာဥ်ကွင်းနဲ့ ဆာရာတော့ဗ်ဒေသက “Engels” လေတပ်စခန်းတွေကို ယူကရိန်းက ဒရုန်းတွေနဲ့တိုက်ခိုက်ခဲ့တယ်လို့ ရုရှားအစိုးရ သတင်း တွေက ဖေါ်ပြနေပါတယ်။
ယူကရိန်းအစိုးရဟာ ဆိုဗီယက်ခေတ်ကထုတ်လုပ်ထားတဲ့ မိုင်ပေါင်း ၄၀၀ ကျော်အထိ ပစ်ခတ်နိုင်တဲ့ Tu-141s ဒရုန်းတွေကို အဆင့်မြင့်မွန်းမံပြင်ဆင်ပြီး အသုံးပြုနေပြီလို့ ယူဆရကြောင်း ရုရှားကာကွယ်ရေးဝန်ကြီးဌာနက သတင်းထုတ်ပြန်ထားပါတယ်။
(ဗီဒီယိုကလစ်ကို https://t.me/burmanewsnetwork မှာ ကြည့်ရှုနိုင်ပါသည်)
