၁၅/၅/၂၀၂၂
ယူကရိန်းသာမက အန္တရာယ်ရှိတဲ့ ကျန်နိုင်ငံတွေကိုပါ ကူညီပေးဖို့ NATO နိုင်ငံခြားရေး၀န်ကြီးတွေက သဘောတူကြောင်း ဗြိတိန်နိုင်ငံခြားရေး၀န်ကြီး Liz Truss က ပြောပါတယ်။ ဂျာမဏီနိုင်ငံ ဘာလင်မြို့မှာ ဒီကနေ့ ကျင်းပတဲ့ NATO နိုင်ငံခြားရေး၀န်ကြီးများ အစည်းအဝေးမှာ သဘောတူလိုက်တာလို့ ဆိုပါတယ်။ ယူကရိန်းကိုသာမက အင်ဒို-ပစိဖိတ် ဒေသကိုပါ အာရုံစိုက်ဖို့အပြင် ကမ္ဘာလုံးဆိုင်ရာ NATO အဖွဲ့ဖြစ်ဖို့ ဆွေးနွေးခဲ့ကြကြောင်းလည်း Elizabeth Mary Truss က ပြောပါတယ်။
ဒီကနေ့ NATO နိုင်ငံခြားရေး၀န်ကြီးများ ဆွေးနွေးပွဲကို ယူကရိန်းနိုင်ငံခြားရေး၀န်ကြီး Dmytro Kuleba လည်း တက်ရောက်ပါတယ်။ ရုရှားကျူးကျော်စစ်ကို ယူကရိန်းနိုင်ငံအနေနဲ့ အောင်မြင်တဲ့အထိ တွန်းလှန်နိုင်ဖို့ NATO အဖွဲ့က ဆက်လက်ကူညီပေးဖို့ သဘောတူသလို ရုရှားအပေါ်ကို လိုအပ်တဲ့အချိန်ထိ ပိတ်ဆို့အရေးယူထားဖို့ကိုလည်း သဘောတူခဲ့တယ်လို့ အမေရိကန်နိုင်ငံခြားရေး၀န်ကြီး Atony Blinken က ပြောပါတယ်။
ဖင်လန်နဲ့ ဆွီဒင်က NATO အဖွဲ့၀င်အဖြစ် လျှောက်ထားပြီဆိုတာနဲ့ ဖြစ်ပေါ်လာတဲ့ ခြိမ်းခြောက်မှုတွေကို ချက်ခြင်း တုန့်ပြန်နိုင်ဖို့အတွက် ရုရှားနဲ့ နယ်နိမိတ်ချင်း ထိစပ်နေတဲ့ NATO အဖွဲ့၀င်နိုင်ငံတွေမှာ တပ်အင်အားတွေ တိုးမြှင့်ချထားဖို့လည်း ဒီကနေ့ ကျင်းပတဲ့ NATO နိုင်ငံခြားရေး၀န်ကြီးများ အစည်းအဝေးက သဘောတူဆုံးဖြတ်လိုက်ကြောင်း သိရှိရပါတယ်။
BNN/ NATO/RussiaVsUkraine
