၁၅ အောက်တိုဘာ ၂၀၂၁
ဖေဖေါ်ဝါရီ ၁ ရက် အာဏာမသိမ်းခင်လေးမှာ ကျန်းမာရေးအကြောင်းပြချက်နဲ့ သမ္မတဦးဝင်းမြင့်ရာထူးကနုတ်ထွက်ပေးဖို့ စစ်ခေါင်းဆောင်တွေက ခြိမ်းခြောက်ဖိအားပေးခဲ့တဲ့ဖြစ်ရပ်ကို ကမ္ဘာကသိသွားလို့ ရှေ့နေဦးခင်မောင်ဇော်ကို အကြမ်းဖက်အာဏာသိမ်းစစ်တပ်က ထပ်မံခြိမ်းခြောက်မှုတွေလုပ်နေတယ်လို့ နိုင်ငံတကာသတင်းတွေက ဖေါ်ပြပါတယ်။
တရားရုံးကအခြေအနေတွေ ထွက်ဆိုချက်တွေကို အပြင်ကို မပေါက်ကြားဖို့နဲ့ တစုံတရာထုတ်ဖေါ်ပြောတာမလုပ်ဖို့ အာဏာသိမ်းစစ်တပ်က ရှေ့နေ ဦးခင်မောင်ဇော်ဆီကို ထပ်မံသတိပေးစာပေးပို့ထားတာလို့ဆိုပါတယ်။
အာဏာမသိမ်းခင်လေးမှာ စစ်ခေါင်းဆောင်တွေက သမ္မတအိမ်တော်ကို အင်အားအလုံးအရင်းနဲ့ရောက်လာပြီး ကျန်းမာရေးအကြောင်းပြချက်နဲ့ရာထူးကနုတ်ထွက်ဖို့နဲ့ မထွက်ဘူးဆိုရင် ဖမ်းဆီးထောင်ချခံရမယ်လို့ ခြိမ်းခြောက်ခဲ့တာပါ။ ကျန်းမာရေးကောင်းနေတာမို့ ဖမ်းချင်ဖမ်း သတ်ချင်သတ် ရာထူးကထွက်မပေးနိုင်ဘူးလို့ သမ္မတဦးဝင်းမြင့်က တုန့်ပြန်ပြန်ပြောဆိုခဲ့တာကို ရှေ့နေဦးခင်မောင်ဇော်က သတင်းမီဒီယာတွေကို ဖွင့်ပြောခဲ့တာဖြစ်ပါတယ်။
သမ္မတဦးဝင်းမြင့်ပြောစကားနဲ့ အာဏာသွားလုတဲ့ဖြစ်ရပ်မှန်ကို ကမ္ဘာကသိသွားတာဟာ အာဏာသိမ်းစစ်ခေါင်းဆောင်တွေအတွက် နောက်ထပ် အရှက်ကွဲစရာဖြစ်ရပ်လို့လည်း အာဆီယံလူ့အခွင့်အရေးစောင့်ကြည့်ရေးအဖွဲ့တွေနဲ့ နိုင်ငံတကာသတင်းတွေကဖေါ်ပြပါတယ်။
BNN
