ရုရှားနဲ့အပစ်အခတ်ရပ်စဲဖို့ ယူကရိန်းကို တိုက်တွန်းအားပေးမှာမဟုတ်ဘူးလို့ နေတိုး အတွင်း ရေးမှူးချုပ် ယန် စတော့တင်ဘတ်က နိုဝင်ဘာ ၈ ရက်နေ့မှာ ပြောလိုက်ပါတယ်။ အီဂျစ်မှာ ပြုလုပ်နေတဲ့ ရာသီဥတုပြောင်းလဲမှုဆိုင်ရာနိုင်ငံတကာညီလာခံမှာ “ယူကရိန်းမှာဘာကြောင့် အပစ်အခတ်ရပ်စဲရေးလုပ်ဖို့ နေတိုးက မကြိုးစားတာလဲ” ဆိုတဲ့မေးခွန်းကို” ယန် စတော့ တင်ဘတ်က ဖြေဆိုသွားတာပါ။
အားလုံးက စစ်ပွဲတွေအလိုမရှိသလို စစ်ပွဲတွေအဆုံးသတ်ချင်ကြပေမဲ့ ယူကရိန်းအနေနဲ့ အပစ်ရပ်စဲ လိုက်လို့ မရနိုင်ဘူးလို့လည်း နေတိုးအတွင်းရေးမှူးချုပ်က ပြောပါတယ်။ ယူကရိန်းကသာ လက်ရှိအခြေအနေမှာ အပစ်အခတ်ရပ်စဲလိုက်ရင် လွတ်လပ်တဲ့နိုင်ငံတစ်နိုင်ငံအဖြစ်ရပ်တည် နေရတဲ့ အခြေအနေတွေဆုံးရှုံးသွားမယ်ဆိုပါတယ်။ ရုရှားဘက်က ပစ်ခတ်တာတွေရပ်ပြီး ယူကရိန်း တောင်းဆိုချက်တွေလိုက်လျောမှ ငြိမ်းချမ်းရေးရနိုင်မယ်လို့လည်း နေတိုး အတွင်းရေးမှူးချုပ်က ပြောပါတယ်။
အိမ်နီးချင်းနိုင်ငံတွေအပေါ်အင်အားသုံးဝင်တိုက်ပြီး လိုချင်တာလုပ်ယူလို့ရတယ်ဆိုတဲ့ အခြေအနေ မျိုးကို လက်ခံလို့မရတဲ့အတွက် အပစ်အခတ်ရပ်စဲရေးလုပ်ဖို့ နေတိုးအဖွဲ့က စဥ်းစားမထားဘူးလို့ ယန် စတော့တင်ဘတ်က ပြောပါတယ်။ ယူကရိန်းရဲ့တောင်းဆိုချက်တွေကိုပဲ ရုရှားဘက်က သဘောတူလိုက်လုပ်ရေးကိုပဲ စဥ်းစားထားတယ်ဆိုပါတယ်။
ရုရှားနဲ့ နေတိုးအဖွဲ့ တိုက်ရိုက် ဖြစ်ပျက်နေတဲ့စစ်ပွဲမဟုတ်ပေမဲ့ ယူကရိန်းဘက်ကနေ အပြည့်အဝဆက်လက်ရပ်တည်သွားဖို့ ဆုံးဖြတ်ပြီးဖြစ်ကြောင်းလည်း နေတိုးအတွင်းရေးမှူးချုပ် ယန် စတော့တင်ဘတ်က ပြောသွားပါတယ်။
