ရန်ကုန်၊ နိုဝင်ဘာ ၇
ရန်ကုန်တိုင်း၊ မရမ်းကုန်းမြို့နယ်၊ သမိုင်း ၁ ရပ်ကွက်၊ သမိုင်းကုံးကျော်တံတားအောက်ရှိ မရမ်းကုန်းမြို့နယ် ၁ ရပ်ကွက် အုပ်ချုပ်ရေးမှူးရုံးကို ယနေ့ မွန်းလွဲ ၁ နာရီ ၂၀ မိနစ်တွင် လက်နက်ကိုင်အဖွဲ့တစ်ခုက ဝင်ရောက်ပစ်ခတ်ရာ ရပ်ကွက်အုပ်ချုပ်ရေးရုံးမှ ဝန်ထမ်း ၃ ဦးသေဆုံးသွားကြောင်း ဒေသခံများထံမှ သိရှိရသည်။
“ မရမ်းကုန်း ၁ ရပ်ကွက်ရုံးကို ဝင်ပစ်တာ။ အချက် ၂၀ လောက်ရှိတယ်။ ၃ ဦးသေတယ်လို့သိရတယ်။ လူနာတင်ကားချည်းလာတာ ၄ စီးပါ။ အခုတော့ စစ်တပ်ရော ရဲရော အကုန်ပိတ်ဆို့ထားတယ်” ဟု ဒေသခံတစ်ဦးက ရန်ကုန်ခေတ်သစ်သတင်းဌာနသို့ပြောဆိုသည်။
ပစ်ခတ်ခံရသူများတွင် ကြံခိုင်ရေး အဖွဲ့ဝင် ၁ ဦး အပါအဝင် ၄ ဦး ပစ်ခတ်ခံရခြင်းဖြစ်ကြောင်း၊ စစ်တပ်က အနီးအနားရှိ ပစ်ခတ်မှုနှင့်မသက်ဆိုင်သော လူငယ် ၂ ဦးကို ရိုက်နှက်ဖမ်းဆီးသွားကြောင်း ဒေသခံများ၏ အဆိုအရ သိရှိရသည်။
ယနေ့ တောင်ဒဂုံမြို့နယ်တွင် ၁၉ ရပ်ကွက်ရုံးနှင့် ၂၀ ရပ်ကွက်စျေးအနီးတွင် ပစ်ခတ်မှုများဖြစ်ပွားပြီး စစ်တပ်နှင့် လက်နက်ကိုင်တချို့ အပြန်အလှန်ပစ်ခတ်ကြကြောင်း သိရှိရသည်။
BNN
